rahhimilo_wuncc'irow_wuk'wa_output.txt

Cyrillic
рах1имило вунцц1иров вук1ва анчихъ гьанл1и гьече биск1инисс гьек1ва (ро),
вук1вал вук1васс гира гьов имал-илал бич1асс г1адули гагьа арамел гач1е язихъиссира бет1ерахъиллъа.
арамдилова лъуре ч1иро, зене кьаро, ллъе̃йи баччиро рохьо-хвабуллъар вол1о инщвара ъама-цц1ара эреллъихъ аватита.
цеб къойллъил котил1и к1уц1иро бик1ваб бехароб жамаг1атил1 
арамдилоб масар бол1о гира гьов рах1имилощуб,
гьощу бисск1инар, гьакк1е йелъа заман баъасс бик1вабел, г1адули гагьа арам гач1арил1.
гьощу масас кьани даг1вал бол1е гьогуни.
цебе багье г1олохъанисс, гьанл1ивера ссагъисс гьек1ва гирал гьов инщулара хъира-кьахеро,
цебе багье илъатов мак1е гирал гьов, эвел гьек1ващул ку̃гьваб хьорар гагьаял гьощваро.
шамсудине кьабар бит1об гирал, бит1об гираларо, даг1ва гагьич1е бал’аллъар вол1о вук1ва.
гьогунвал цещул гьекье: 
“шамсудине, ме гьанл1ивора г1акъули гираворо вуцц1ира эро ме гьаллъавал 
— гьаберо гьекьич1об бит1о гира, бит1о гираро вук1вач1е.
де гьек1об эберо гьекьал1об, дия раъалал1ир бехьвал1об зиянера гач1ен.
беккуб эрел денал эккассе-хе.
даг1валлъалвол бик1васс гьеч1ехейил рах1имилощва хъизан гагьа пикурул бол1е.
йел1ирой гьакк1ой ургъел абата.
“гьощва ц1акъе данде йеккурой гьакк1ой гира гьадий х1амзатий ник1оял яхьоро”
— гьекье ах1мадил — “ц1акъой гъардар итай, гьинир гьандиккой гира гьудуй.”
гирабал эрелал бакъу х1амзатар яхьо хара гьек1вал т1амо, л1абиясселлъил мухъе гагьа х1адура арамди.
мухъел бил’об бик1вач1е кьани арамди цц1арда-амда, кепе кьабарел бик1ва. 
рах1имилол ссантил данде ххваллъвал хьогьоб бет1ерахъе бол1ир багье гьордоб.
бешанщув минарщул мугьва эккоб унщиллъа рошибол ригъо хьогьоб ахи гагье гьуги,
гьакк1ек1е кунт1а калххузавал нищихъо х1ахьирил бехьва гьордва бечерар.
к1ера мишиллъовал гьердоб къоте бол1е лъараг1еллъар бел1а.
ахек1е авал мадувалщва къера, гьинивал бехьваб хиндалъер инщварал бик1о.
лъе̃гьар, гьанч1ар гагьаро.
лъараг1еллъар, гьанл1ивал рек1ва эрел таъач1е лъалода бел1е болъар раъилал1е.
гьера х1ижандоб ллъе̃ллъар баъен ссантиллъил гьекье.
“инллъаххвара точч1ир гирал ме, гьагуни к1уц1ириял, де гьардир га̄р хъарахъол1ир йел1аллъал мак1е гагьаро.”
мак1ел гагьо, гьоллъа макьил1ивого гьа̃ъа, цевк1ера г1олохъанисс ч1ик1варобе.
квари гьич1угьвар (|| гьич1ухвар) хъочибил рикко гьоллъиб кванссол1олохъеллъа цевал, инкубел1алахъеллъа цевал вугъо.
гьоллъил мацц1е: “эбо бищда къвароберо?” инкубахъ гиращул гьекье: “де гири дув гьов вашащуб бол1ал1обал хьогьобал эрел хъвара вохьвав!
“ме херо кванссол1а щварил” —  мацц1е ссантиллъил1.
де дува вашащуб болъобал эрел хъвара вохьва. ссантиллъил хьогьобал эрел анщ бессасс, билъобал эрел мацц1е кванщохъ гиращвар.
эбо ди ващащул билъоб гагьа гираб гьаб дуналлъа?
дув вашащул, дув минарек1вал кк1обо ме гьакк1ол1 мак1валлъа йелъа гира.
гьор анлъерди а̃гье ссанти гьеч1о к1анц1ире.
ссвардо гьоллъа арамел мисач1е, бик1вабел гьоллъа гьаги а̃лъерди ц1акъе къвареч1е.
йел1о йик1васс, гьугув ваша жемира гьоллъил к1азил1и.
вогунира воссасс гьощук1е йел1е кунт1вар.
рах1имилощвар вуч1ащ гагьал гьовекьо.
гьинч1обел масасс, гьоллъа ххабарел бол1о, абата гьгунивал ссеххи.
гьек1об гьоллъил1 маса-мацц1ерел бол1ич1е гьордоб, ч1икварора лъараг1ееллъарил баъа,
амма ссантиллъа ххеххил инщтура-анл1ира нишиллъил рак1варавал бел1ич1е гьоб инллъил1ера бол1об эрел.
гьоссаллъавал гьеч1об ургъелел бета, ссантил кунт1ал ч1иквароб маг1ишателлъа бик1ва.
гьор хъвабач1 гьини гьант1ва темеханщул1е вохьвасс вук1ва бичахисо, 
дарам базарллъа вук1уров хьох1о вочерав чачандилов хъадикьов цц1ей.
к1ера г1орц1инел хе-хе гандо мак1ач1ул1и гьач1ваба̄р ваъассеро вол1а гирав гьащва,
х1изандо ллъе̃ллъар ваъен а̃гье цеб ник1об к1ва̃лъил1ароб ч1ирдер.
лъебдо рак1ва зинк1улдарихъ га̄р вол1е.
арами, мак1и мисен ваххо-вухху гьав.
хьогьо заманалъил ххарга̄-ч1арго, вол1о вук1васс г1орц1инавал хъибо ххамик1е,
ххунжи гьини гьовол вулъо, ургъерарихъ авата ссеххи.
боъора къо1ллъавал гьав чачанал1ир инщубда гьанеллъар веденир ваъа.
къада гьероб мучаллъил гьакк1ел йил’асс, х1оллъа гагьоб к1ера вашащвар га̄р лъабийл кунт1аб эрел таъассри воццихха вук1ва.
гьощва ургъелел бик1вач1е мак1илоб, эвора гьекъара дарамда вук1вабел, гьощуй йик1ва гьич1ухвай йасси мак1е-масел гач1ой, кунт1ал рагъилвал вохьвач1е вотав.
инараллъил гьой ваццор мак1илоб г1адулил гагьо, гьощуч1 авалавора йик1урой йик1ва.
э̃воралхе къади гьанл1ивора цц1ери а̃гьов вочерав гьек1ва вук1ва.
га̄р таъав вашащвар цц1ери билъе гьощул шарокьоб.
рел1е нишади маъу мак1и гьич1угь[хв]абе гьакк1абади белъасс индварира эбера ххинде.
къада вухху гьера цев ваша шаро.
гьакьвабал1валел абов, гергамоб баг1аллъал1, гьич1угьваб гьандоллъил1 ц1еяров г1олохъан гьек1ва.
къадищва къваро бик1ва ссессера вашащвар инщварира маса гирабал эрел, амма ку̃гьач1е бессасс бик1ва.
цеб къойддъил гирабал эрел маса бекку гьощул шарощвар.
гьоб къой бик1ва къадищул шариг1ат гагьироб къой.
къадищул гьекье шарощвар дува.
хъварани шарг1еллъа беккуроб эрелал бичо г1арце эккассал, дува къварани, гьаб ваццибадиго гьагуни вугъи.
гьоб инщуб бол1обал эрел масен шарощва дуналира беч1ат1ер багье, гьов ц1акъера ц1акъе сулъариров вол1е.
хей биъирибал арам гьа̃ъа къвареч1ов вол1е. ххеххала инщвара никъо баъаб эребал бичо шаро гьехъар гьечч1е.
кьани ссварде гьов гьаналда: “индар эбе гагьа, эбе г1иллаллъил вол1а гиравобар биъач1об бик1ва гьощва.
буххуч1е гьов ваъа мак1ва гьеч1ехейл арчвал, алухъел вохьвасс.
гьандащи гьандва к1уц1ире гьов.
гьоб гьандоб гира анч1ил1 гьане хъат1улиго гьа̃ъироб мак1ва.
гирабал г1арце ваъабал гьаналда бич1ал бич1о, гьера хъат1ули боъал (|| баг1ал) билъо га̄вал кекьир ххарга гьов гьанл1ир.
гьор ургъедил рессасс гьеч1ессей мисаб авал’ллъинир вол1е гьав.
гьощва миса гьагуни къват1а бекьоб к1анча гьанч1ер кунт1ак1е гьакк1е, гьордол гьанч1о-гьанч1обал эрел ъамда цеббеч1ат1об кунтаб амахел.
гьов гьаъарик1енараллъа кунт1авал дандел вол1о нацц1у-насур гагьир авата.
инщвар цц1ери рах1имило вук1вар гьощулал маса, шаро гираро гьащулал гьекье.
ххинда мак1ва гач1е ссей мисаб авал’ллъар ссвардаликье.
гьоб релъел хьогьоб адабхатирел гагьо, шаро волъа цеб мина гираб эшеллъилир кьи̃гьа, ц1акъе рах1атисс, мицц1аб макьуллъа кьи̃гьа гьов.
рахари гьечч1ен котобел шарощуб адаб гагьир багье ххваженди, усст1ула миса гьощва гьервалеллъил1 гагьоб цеб мицц1аб чорпа лъурал1 г1ороб цц1ант1урллъинир т1индо, чорпал1и илилоб амахел билъо.
гьогуни эсебол1и ч1аг1ал1 бец1об цеб к1оххел.
ллъебо чорпаллъил, цц1ор ч1авал бел1е гьардоб хьогьо заман.
ххваженщвар ххагек1ен шарощва бичч1ире инщвар цеб эбе бик1ул гьекьа хьулик1е вук1вар гьов.
ч1аг1ахе шубоб эрел бегварил1 рахъелл1вал гьервалел кунт1аб г1амаллъил1, пуроб бак1вал бец1ероб.

Latin
raʜimilo wunc'ːirow wuk'ʷa ančiq hanʟi heče bisk'inisː hek'ʷa (ro),
wuk'ʷal wuk'ʷasː gira how imal-ilal bič'asː ʕaduli gaha aramel gač'e jaziqisːira bet'eraqiɬːa.
aramdilowa ɬure č'iro, zene ʟ'aro, ɬːẽji bačːiro roxo-χʷabuɬːar woʟo inšːʷara ʔama-c'ːara ereɬːiq awatita.
ceb q'ojɬːil kotiʟi k'uc'iro bik'ʷab beχarob žamaʕatiʟ 
aramdilob masar boʟo gira how raʜimilošːub,
hošːu bisːk'inar, hak'ːe jeɬa zaman baʔasː bik'ʷabel, ʕaduli gaha aram gač'ariʟ.
hošːu masas ʟ'ani daʕwal boʟe hoguni.
cebe bahe ʕoloqanisː, hanʟiwera sːaʁisː hek'ʷa giral how inšːulara qira-ʟ'aχero,
cebe bahe iɬatow mak'e giral how, ewel hek'ʷašːul kũhʷab xorar gahajal hošːʷaro.
šamsudine ʟ'abar bit'ob giral, bit'ob giralaro, daʕwa gahič'e bal’aɬːar woʟo wuk'ʷa.
hogunwal cešːul heʟ'e: 
“šamsudine, me hanʟiwora ʕaq'uli giraworo wuc'ːira ero me haɬːawal 
— habero heʟ'ič'ob bit'o gira, bit'o giraro wuk'ʷač'e.
de hek'ob ebero heʟ'aʟob, dija raʔalaʟir bexʷaʟob zijanera gač'en.
bekːub erel denal ekːasːe-χe.
daʕwaɬːalwol bik'ʷasː heč'eχejil raʜimilošːʷa qizan gaha pikurul boʟe.
jeʟiroj hak'ːoj urʁel abata.
“hošːʷa c'aq'e dande jekːuroj hak'ːoj gira hadij ʜamzatij nik'ojal jaxoro”
— heʟ'e aʜmadil — “c'aq'oj ʁardar itaj, hinir handikːoj gira huduj.”
girabal erelal baq'u ʜamzatar jaxo χara hek'ʷal t'amo, ʟabijasːeɬːil muqe gaha ʜadura aramdi.
muqel bil’ob bik'ʷač'e ʟ'ani aramdi c'ːarda-amda, kepe ʟ'abarel bik'ʷa. 
raʜimilol sːantil dande χχʷaɬːwal xohob bet'eraqe boʟir bahe hordob.
bešanšːuw minaršːul muhʷa ekːob unšːiɬːa rošibol riʁo xohob aχi gahe hugi,
hak'ːek'e kunt'a kalχːuzawal nišːiqo ʜaxiril bexʷa hordwa bečerar.
k'era mišiɬːowal herdob q'ote boʟe ɬaraʕeɬːar beʟa.
aχek'e awal maduwalšːʷa q'era, hiniwal bexʷab χindaɬer inšːʷaral bik'o.
ɬẽhar, hanč'ar gaharo.
ɬaraʕeɬːar, hanʟiwal rek'ʷa erel taʔač'e ɬaloda beʟe boɬar raʔilaʟe.
hera ʜižandob ɬːẽɬːar baʔen sːantiɬːil heʟ'e.
“inɬːaχχʷara toč'ːir giral me, haguni k'uc'irijal, de hardir gār qaraqoʟir jeʟaɬːal mak'e gaharo.”
mak'el gaho, hoɬːa maʟ'iʟiwogo hãʔa, cewk'era ʕoloqanisː č'ik'ʷarobe.
kʷari hič'uhʷar (|| hič'uχʷar) qočibil rikːo hoɬːib kʷansːoʟoloqeɬːa cewal, inkubeʟalaqeɬːa cewal wuʁo.
hoɬːil mac'ːe: “ebo bišːda q'ʷarobero?” inkubaq girašːul heʟ'e: “de giri duw how wašašːub boʟaʟobal xohobal erel qwara woxʷaw!
“me χero kʷansːoʟa šːʷaril” —  mac'ːe sːantiɬːiʟ.
de duwa wašašːub boɬobal erel qwara woxʷa. sːantiɬːil xohobal erel anšː besːasː, biɬobal erel mac'ːe kʷanšːoq girašːʷar.
ebo di wašːašːul biɬob gaha girab hab dunaɬːa?
duw wašašːul, duw minarek'ʷal k'ːobo me hak'ːoʟ mak'ʷaɬːa jeɬa gira.
hor anɬerdi ãhe sːanti heč'o k'anc'ire.
sːʷardo hoɬːa aramel misač'e, bik'ʷabel hoɬːa hagi ãɬerdi c'aq'e q'ʷareč'e.
jeʟo jik'ʷasː, huguw waša žemira hoɬːil k'aziʟi.
wogunira wosːasː hošːuk'e jeʟe kunt'war.
raʜimilošːʷar wuč'ašː gahal howeʟ'o.
hinč'obel masasː, hoɬːa χːabarel boʟo, abata hguniwal sːeχːi.
hek'ob hoɬːiʟ masa-mac'ːerel boʟič'e hordob, č'ikʷarora ɬaraʕeeɬːaril baʔa,
amma sːantiɬːa χːeχːil inšːtura-anʟira nišiɬːil rak'ʷarawal beʟič'e hob inɬːiʟera boʟob erel.
hosːaɬːawal heč'ob urʁelel beta, sːantil kunt'al č'ikʷarob maʕišateɬːa bik'ʷa.
hor qwabač' hini hant'wa temeχanšːuʟe woxʷasː wuk'ʷa bičaχiso, 
daram bazarɬːa wuk'urow xoʜo wočeraw čačandilow qadiʟ'ow c'ːej.
k'era ʕorc'inel χe-χe gando mak'ač'uʟi hač'ʷabār waʔasːero woʟa giraw hašːʷa,
ʜizando ɬːẽɬːar waʔen ãhe ceb nik'ob k'ʷãɬiʟarob č'irder.
ɬebdo rak'ʷa zink'uldariq gār woʟe.
arami, mak'i misen waχːo-wuχːu haw.
xoho zamanaɬil χːargā-č'argo, woʟo wuk'ʷasː ʕorc'inawal qibo χːamik'e,
χːunži hini howol wuɬo, urʁerariq awata sːeχːi.
boʔora q'o1ɬːawal haw čačanaʟir inšːubda haneɬːar wedenir waʔa.
q'ada herob mučaɬːil hak'ːel jil’asː, ʜoɬːa gahob k'era wašašːʷar gār ɬabijl kunt'ab erel taʔasːri wocːiχːa wuk'ʷa.
hošːʷa urʁelel bik'ʷač'e mak'ilob, ewora heq'ara daramda wuk'ʷabel, hošːuj jik'ʷa hič'uχʷaj jasːi mak'e-masel gač'oj, kunt'al raʁilwal woxʷač'e wotaw.
inaraɬːil hoj wacːor mak'ilob ʕadulil gaho, hošːuč' awalawora jik'uroj jik'ʷa.
ẽworalχe q'adi hanʟiwora c'ːeri ãhow wočeraw hek'ʷa wuk'ʷa.
gār taʔaw wašašːʷar c'ːeri biɬe hošːul šaroʟ'ob.
reʟe nišadi maʔu mak'i hič'uh[χʷ]abe hak'ːabadi beɬasː indwarira ebera χːinde.
q'ada wuχːu hera cew waša šaro.
haʟ'ʷabaʟʷalel abow, gergamob baʕaɬːaʟ, hič'uhʷab handoɬːiʟ c'ejarow ʕoloqan hek'ʷa.
q'adišːʷa q'ʷaro bik'ʷa sːesːera wašašːʷar inšːʷarira masa girabal erel, amma kũhač'e besːasː bik'ʷa.
ceb q'ojddʔil girabal erel masa bekːu hošːul šarošːʷar.
hob q'oj bik'ʷa q'adišːul šariʕat gahirob q'oj.
q'adišːul heʟ'e šarošːʷar duwa.
qwarani šarʕeɬːa bekːurob erelal bičo ʕarce ekːasːal, duwa q'ʷarani, hab wacːibadigo haguni wuʁi.
hob inšːub boʟobal erel masen šarošːʷa dunalira beč'at'er bahe, how c'aq'era c'aq'e suɬarirow woʟe.
χej biʔiribal aram hãʔa q'ʷareč'ow woʟe. χːeχːala inšːʷara niq'o baʔab erebal bičo šaro heqar heč'ːe.
ʟ'ani sːʷarde how hanalda: “indar ebe gaha, ebe ʕillaɬːil woʟa girawobar biʔač'ob bik'ʷa hošːʷa.
buχːuč'e how waʔa mak'ʷa heč'eχejl arčʷal, aluqel woxʷasː.
handašːi handwa k'uc'ire how.
hob handob gira anč'iʟ hane qat'uligo hãʔirob mak'ʷa.
girabal ʕarce waʔabal hanalda bič'al bič'o, hera qat'uli boʔal (|| baʕal) biɬo gāwal keʟ'ir χːarga how hanʟir.
hor urʁedil resːasː heč'esːej misab awal’ɬːinir woʟe haw.
hošːʷa misa haguni q'ʷat'a beʟ'ob k'anča hanč'er kunt'ak'e hak'ːe, hordol hanč'o-hanč'obal erel ʔamda cebbeč'at'ob kuntab amaχel.
how haʔarik'enaraɬːa kunt'awal dandel woʟo nac'ːu-nasur gahir awata.
inšːʷar c'ːeri raʜimilo wuk'ʷar hošːulal masa, šaro giraro hašːulal heʟ'e.
χːinda mak'ʷa gač'e sːej misab awal’ɬːar sːʷardaliʟ'e.
hob reɬel xohob adabχatirel gaho, šaro woɬa ceb mina girab ešeɬːilir ʟ'ĩha, c'aq'e raʜatisː, mic'ːab maʟ'uɬːa ʟ'ĩha how.
raχari heč'ːen kotobel šarošːub adab gahir bahe χχʷažendi, usːt'ula misa hošːʷa herwaleɬːiʟ gahob ceb mic'ːab čorpa ɬuraʟ ʕorob c'ːant'urɬːinir t'indo, čorpaʟi ililob amaχel biɬo.
hoguni eseboʟi č'aʕaʟ bec'ob ceb k'oχːel.
ɬːebo čorpaɬːil, c'ːor č'awal beʟe hardob xoho zaman.
χχʷaženšːʷar χːagek'en šarošːʷa bič'ːire inšːʷar ceb ebe bik'ul heʟ'a xulik'e wuk'ʷar how.
č'aʕaχe šubob erel beɡʷariʟ raqelʟʷal herwalel kunt'ab ʕamaɬːiʟ, purob bak'ʷal bec'erob.