story.txt

ᤗᤳᤌᤡᤰ ᤐᤠᤱᤓᤣ᤹ᤀᤥ ᤋᤣ᤺ᤱᤎᤡᤰ ᤘᤕᤧ॥
ᤜᤧᤰᤁᤩᤠᤱ ᤂᤧᤴ ᤛᤠᤛᤪᤠᤗᤡ ᤐᤣᤖᤧᤳᤇ॥
ᤁᤢᤔᤡᤳᤋᤡᤴ ᤜᤡᤶᤔᤥ ᤗᤧᤖᤢᤎᤀᤠᤱ ᤛᤠᤛᤪᤠᤗᤡ ᤐᤣ॥
ᤂᤧ᤹ᤕᤥ ᤁᤢᤴᤔᤢᤵᤔᤠᤸᤗᤧ ᤆᤠ ᤆᤥᤃᤢᤀᤠᤱ ᤐᤡᤖᤢ ᤜᤧᤰᤁᤩᤠᤱ ᤆᤠ ᤛᤢᤶᤒᤠᤰᤆᤧᤴ ᤑᤠ ᤏᤰᤁᤡᤸᤗᤧ ᤛᤢᤶᤒᤠᤰ ᤐᤡᤖᤢᤖᤧᤳᤇ॥
ᤜᤧᤰᤁᤩᤠᤱ ᤁᤢᤶᤔᤠᤱᤔᤡᤒᤠᤸᤗᤧ ᤛᤧᤴᤗᤠᤵᤋᤢ ᤀᤠᤔᤠᤀᤧ ᤁᤴ ᤌᤣᤔᤠ ᤛᤢᤶᤒᤠᤰᤏᤧᤒᤧ. ᤁᤴ ᤛᤢᤶᤒᤠᤰᤁᤡᤴ ᤁᤢᤛᤡᤱ ᤔᤧᤴᤏᤡ᤺ᤵᤐᤠᤴᤏᤡᤱᤃ ᤔᤧᤳᤋᤢ॥
ᤐᤠᤱᤔᤧ ᤁᤴ ᤛᤢᤶᤒᤠᤰᤁᤡᤱᤃ ᤑᤠᤴᤏᤠ॥
ᤁᤢᤈᤠᤏᤢᤒᤠᤖᤧᤳᤇ ᤗ᤹ᤖᤧ॥
ᤂᤢᤏᤧ᤹ᤀᤠᤱ ᤀᤡ᤺ᤳᤋᤢ॥
ᤀᤠᤸᤗ ᤀᤡᤱᤃᤠ᤹ᤀᤠᤱ ᤀᤠᤜᤡᤶᤔᤥ ᤐᤣ᤺ᤰᤁᤠ᤺ᤱ ᤜᤡᤶᤛᤠᤔᤠᤴ ᤑᤠᤴ ᤆᤧᤵᤋᤢᤱᤅᤠᤱ ᤐᤡᤖᤢᤱ ᤜᤧᤰᤁᤩᤠᤱ ᤌᤰᤔᤠ ᤐᤠᤱᤄᤢᤱᤅᤠᤱ ᤁᤢᤈᤠᤏᤢᤖ ᤀᤰᤂᤣ ᤀᤠᤜᤡᤶᤛᤕᤱᤜᤠ᤹ᤏᤢ ᤀᤡᤱᤃᤠ᤹ ᤆᤠᤱ ᤗ᤹ᤖᤡᤰ ᤀᤡ᤺ᤳᤋᤢᤀᤠᤱ ᤁᤢᤛᤠᤛᤪᤠᤗᤡᤏᤢ ᤏᤢᤰᤂᤧ ᤋᤧ॥
ᤏᤢᤰᤂᤧ ᤋᤧᤀᤠᤱ ᤁᤢᤜᤡᤶᤛᤠᤔᤠᤴ ᤔᤧᤳᤋᤢ. ᤀᤠᤀᤡᤱᤃ ᤔᤶᤔᤠᤖᤧ ᤀᤡᤱᤃᤠ᤹ ᤛᤠᤖᤡᤰ ᤁᤢᤈᤠᤃᤧᤏᤢᤒᤠ ᤛᤢᤶᤒᤠᤰᤁᤡᤴ ᤌᤰᤋᤢᤀᤠᤱ ᤐᤡᤖᤠᤱ॥
ᤀᤠᤀᤡᤴ ᤏᤠᤀᤡᤀᤠᤱ ᤂᤧᤴ ᤛᤢᤶᤒᤠᤰᤁᤡᤴ ᤆᤥᤃᤢᤶᤔᤠᤱ ᤆᤠᤶ ᤔᤧᤳᤋᤢ॥
ᤜᤧᤰᤁᤩᤠᤱ ᤐᤱᤗ ᤑᤠ᤹ᤀᤠᤱ ᤁᤢᤜᤡᤶᤛᤠᤔᤠᤸᤗᤧ ᤔᤧᤳᤋᤢ. ᤜᤧᤰᤁᤣ ᤔᤧᤳᤋᤢᤀᤠᤱ ᤂᤢᤏᤧ᤹ ᤕᤠᤰᤕᤠᤰ ᤀᤰᤂᤣ ᤀᤔᤧᤳᤋᤢ. ᤑᤠᤴ ᤋᤠᤱᤔᤠᤸᤗᤧ ᤗᤢᤱᤔᤠ᤹ ᤛᤩᤠ᤺ᤳ ᤗ᤹ ᤗᤢᤱᤔᤠ᤹ ᤋᤢᤰᤋᤢ ᤕ᤺ᤶᤒᤠᤴ ᤔᤧᤔᤠᤳᤋᤡᤴᤒᤠ ᤐᤥ᤺ᤰᤂᤠ॥
ᤜᤧᤰᤁᤩᤠᤱ ᤀᤠᤸᤗ ᤂᤧᤴ ᤐᤢᤖᤠᤴ ᤛᤠᤵᤐᤀᤡᤴ ᤆᤧᤵᤋᤢᤀᤠᤱ ᤌᤰ ᤐᤠᤱᤄᤢ॥
ᤌᤰ ᤐᤠᤱᤄᤢᤀᤠᤱ ᤁᤢᤜᤡᤛᤕᤱᤜᤠ᤹ ᤁᤠᤰ ᤔᤧᤕᤢᤱᤛᤡᤱᤅᤠᤱ ᤆᤠᤔᤠ ᤔᤧᤜᤣ᤺ᤰᤋᤢ ᤂᤧᤴ ᤁᤢᤴᤏᤢᤵᤔᤠᤸᤗᤧ ᤐᤡᤖᤢᤒᤠᤴ ᤜᤧᤰᤁᤣ ᤁᤢᤈᤠᤏᤢ᤹ ᤑᤠ᤹ᤀᤠᤱ ᤂᤢᤏᤧ᤹ ᤐᤠᤜᤡᤗᤧ ᤋᤰᤁᤡᤴᤏᤢ ᤛ᤹ᤖᤢᤀᤠᤱ ᤆ॥
ᤆ ᤋᤣ᤺ᤛᤢᤸᤗᤧ ᤒᤧᤸᤗᤠ ᤜᤠᤵᤋᤢ॥
ᤜᤠᤵᤋᤢᤀᤠᤱ ᤁᤢᤔᤡᤰᤁᤡᤴ ᤀᤰᤂᤣ ᤗᤧᤰᤂᤢᤸᤗᤧ ᤒᤧᤸᤗᤠ ᤁᤢᤜᤡᤶᤛᤠᤔᤠᤸᤗᤧ ᤔᤧᤳᤋᤢ. ᤀᤡᤱᤃᤠ᤹ᤃ ᤒᤠᤖᤠᤒᤠᤷ ᤌᤠᤒᤢᤱᤅᤠᤱ ᤏᤧ ᤂᤧᤏᤧ᤹ ᤌᤣᤔᤠ᤺ᤱ ᤁᤳᤏᤠ ᤀᤃᤧᤔᤧᤳᤋᤢ ᤔᤧᤳᤋᤢᤖ ᤕᤢᤱᤅᤠ ᤜᤧᤰᤁᤩᤠᤱ ᤒᤠᤜᤧᤰᤁᤣ ᤂᤧᤴ ᤜᤠᤵᤋᤢᤀᤠᤱ ᤛᤩᤠ॥
ᤌᤡᤰᤕᤧᤴ ᤌᤰᤛᤠ ᤏᤢ ᤐᤢᤛᤠᤗᤢᤶᤔᤥ ᤕᤶᤒᤠ ᤌᤱ ᤐᤥ᤺ᤰᤂᤧ॥
ᤐᤢᤛᤠᤜᤠ᤹ ᤁᤧᤰᤁᤧᤖᤡᤰ ᤛᤢᤈᤠ ᤔᤧᤈᤥᤃᤧ॥
ᤁᤴ ᤗᤠᤱ ᤗᤡᤛᤡ ᤁᤧᤒᤵᤐᤠ ᤌᤰᤛᤠᤜᤠ᤹ᤖᤧ ᤂᤠᤶᤒᤣ᤺ᤰᤁᤥᤖᤖᤰ ᤘᤠ᤹ᤔᤠ ᤔᤧᤄᤥᤛᤢ ᤋᤠᤶᤓᤢᤱᤔᤥ ᤘᤠ᤹ᤔᤠ ᤛᤡᤱᤒᤢᤱ ᤛᤶᤍᤠᤱ ᤘᤠ᤹ᤔᤠ ᤔᤧᤱᤄᤥᤛᤢᤴ॥
ᤋᤠᤶᤓᤢᤱ ᤏᤢ ᤛᤡᤱᤒᤢᤱᤃ ᤀᤠᤏᤡ᤹ ᤐᤢᤛᤠᤖᤧ ᤐᤱᤘᤠᤔᤠ ᤍᤧᤴ ᤜᤡᤶ ᤆᤥ᤺ᤰᤔᤠ ᤍᤧᤴ॥
ᤐᤢᤛᤠᤜᤠ᤹ᤖᤧ ᤐᤠ᤺ᤴᤏᤡᤴ ᤔᤧᤄᤧᤵᤛᤢᤀᤠᤱ ᤛᤒᤠᤜᤠ᤹ ᤛᤠᤖᤡᤰ ᤂᤢᤴᤆᤡ᤹ ᤕᤠᤰ ᤗᤧ᤹ᤖᤧ ᤔᤧᤴᤍᤠ ᤓᤧᤍᤠ ᤋᤰᤔᤡᤒᤠ ᤐᤡᤳ ᤛᤠᤱᤘᤧᤌᤠ ᤀᤠᤱ ᤋᤠᤶᤓᤢᤱᤅᤡᤴ ᤗᤧᤵᤔᤠ ᤔᤧᤴ ᤋᤧᤴᤍᤧᤴ॥
ᤋᤠᤶᤓᤢᤱ ᤔᤧᤴᤏᤧ ᤌᤰᤛᤠᤜᤠ᤹ᤀᤠᤱ ᤁᤧᤛᤡᤒᤠ ᤔᤧᤒᤥ᤺ᤰᤂᤧ॥
ᤌᤡᤰᤕᤧᤴ ᤁᤴ ᤌᤰᤛᤠᤜᤠ᤹ ᤔᤧᤒᤧᤀᤠᤱ ᤂᤢᤴᤆᤡ᤹ ᤜᤠᤱᤂᤡᤖᤡᤱᤒᤧᤴ ᤛᤡᤘᤠᤛᤡᤴᤍᤥ ᤔᤧᤈᤥᤃᤢ. ᤂᤠᤛᤧᤶ ᤂᤠᤖᤠ ᤔᤧᤏᤠ᤺ᤳᤋᤢ॥
ᤌᤰᤛᤠᤜᤠ᤹ᤖᤧ ᤐᤧᤗᤡ᤺ᤴ ᤂᤡᤖᤡᤱᤒᤧᤸᤗᤧ ᤂᤧᤶᤂᤧᤶ ᤔᤧᤸᤗᤠᤵᤐᤧ ᤗᤴᤍᤧᤒᤧ॥
ᤜᤧᤰᤁᤣ᤺ᤸᤗᤧᤃ ᤋᤰᤔᤡᤒᤧᤴ ᤁᤢᤏᤡᤱᤘᤠ᤹ ᤋᤢᤃᤧ॥
ᤂᤡᤖᤡᤒᤧᤴ ᤜᤥ᤺ᤵᤋᤧᤸᤗᤧᤃ ᤋᤰᤔᤡᤒᤧᤸᤗᤧ ᤇᤢᤶᤗᤢᤱᤎᤡᤰ ᤕᤢᤰᤂᤢᤀᤠᤱ ᤁᤡᤎᤡᤖᤢᤵᤐᤧᤴ ᤐᤠ᤺ᤴ ᤜᤢ᤹ᤖᤢᤀᤠᤱ ᤂᤡᤖᤡᤱᤒᤠ ᤋᤃᤡ ᤐᤠᤱᤄᤢ॥
ᤁᤡᤎᤡᤖᤢᤵᤐᤧᤴ ᤐᤣᤀᤠᤱ ᤂᤡᤖᤡᤱᤒᤧᤴ ᤔᤧᤳᤋᤢ. ᤀᤠᤍᤠᤱᤒᤣ. ᤀᤠᤏᤡᤃᤧᤃ ᤐᤢᤛᤠᤜᤠ᤹ᤖᤧ ᤌᤰᤕᤧᤵ ᤔᤧᤈᤥᤃᤡᤃᤧᤀᤠᤱ ᤛᤠᤰᤔᤧᤴᤈᤠ ᤔᤧᤛᤧᤖᤡᤃᤧᤒᤠ ᤜᤧᤰᤁᤣ ᤗ᤹ᤒᤧ॥
ᤂᤡᤖᤡᤱᤒᤠᤸᤗᤧ ᤁᤢᤏᤡᤱᤘᤠ᤹ ᤔᤕᤧᤀᤠᤱ ᤛᤧᤴᤗᤠᤵᤋᤢ "ᤌᤣᤀᤠᤱ" ᤔᤡᤎᤡᤖᤢᤵᤐᤧᤴ ᤐᤠᤖᤧ." ᤀᤠᤏᤡᤃᤧ ᤋᤢᤰᤂᤧ ᤔᤧᤳᤋᤢᤶᤒᤧᤀᤠᤱ ᤋᤠᤖᤢᤶᤒᤧᤒᤠ ᤛᤡᤛᤠᤷᤜᤠ᤹ ᤁᤴ ᤁᤡᤍᤠ ᤔᤢᤕᤠᤖᤧ ᤁᤠᤰ ᤔᤧᤈ ᤔᤧᤍᤧᤛᤢ ᤔᤧᤒᤡᤖᤡᤃᤧ॥
ᤋᤰᤔᤡᤒᤧᤸᤗᤧ ᤁᤡᤎᤡᤖᤢᤵᤐᤧᤴ ᤔᤧ᤹ ᤔᤧ᤹ ᤗᤠᤵᤋᤢ." ᤂᤧᤏᤧ᤹ ᤌᤣᤀᤡᤴ ᤁᤧᤜᤠᤵᤋᤢᤒᤧ" ᤁᤴ ᤐᤢᤜᤠ᤹ᤖᤧ ᤀᤠᤏᤡ᤹ᤍᤥ ᤌᤰᤛᤠᤜᤠᤅᤡᤸᤗᤧ ᤁᤢᤆᤠᤜᤠᤛᤠ᤹ ᤔᤧᤆ ᤔᤧᤒᤡᤖᤢ॥
ᤁᤱᤜᤠ᤹ᤖᤧ ᤀᤠᤏᤡ᤹ ᤜᤠᤅᤡᤱᤏᤧᤛᤠ ᤏᤧᤔᤧᤴᤇᤠᤖᤢᤴ ᤂᤧᤏᤧ᤹ ᤀᤠᤅᤠᤏᤢᤃ ᤜᤠᤳᤋᤡᤴᤏᤡ ᤁᤡᤀᤠᤱᤒᤧ" ᤂᤧᤴ ᤐᤢᤛᤠᤜᤠ᤹ᤃ ᤌᤡᤂᤢᤶ ᤔᤧᤒᤥ᤺ᤰᤂᤧᤀᤠᤱ ᤔᤧᤘᤠ॥
ᤌᤣᤛᤠᤱ ᤀᤠᤸᤗᤥ ᤆᤥ᤺ᤰᤔᤠ ᤔᤧᤛᤡᤰᤋᤢ॥
ᤀᤠᤏᤡᤃ ᤌᤡᤂᤢᤶ ᤀᤠᤱᤃᤳᤏᤧᤴ ᤌᤢᤶ ᤀᤠᤃᤳᤋᤢᤶᤛᤠᤱ॥
ᤋᤰᤔᤡᤒᤧᤸᤗᤧ ᤁᤢᤒᤠᤴᤏᤡᤴ ᤂᤧᤵᤛᤢᤀᤠᤱᤖᤰ ᤂᤡᤖᤡᤱᤒᤧᤸᤗᤧ ᤛᤡᤰᤁᤢᤶ ᤏᤡᤱᤘᤠ᤹ ᤂᤥᤛᤢ॥
ᤜᤧᤰᤁᤩᤠᤱᤔᤥ᤺ᤂᤡᤶᤔᤥ ᤌᤰᤛᤠᤜᤠ᤹ ᤂᤢᤰᤂᤢᤛᤡᤀᤠᤱ ᤐᤢᤛᤠᤜᤠ᤹ᤏᤢ ᤌᤰᤛᤧ ᤐᤣ᤺ᤰᤔᤠ ᤀᤡᤱᤈᤠᤱ ᤐᤡᤖᤢᤛᤡ॥
ᤌᤰᤛᤠᤜᤠ᤹ᤖᤧ ᤐᤠ᤺ᤴᤏᤡᤴ ᤁᤠᤰᤘᤠᤀᤡᤸᤗᤧ ᤂᤧᤵᤛᤢ॥
ᤐᤧᤖᤧᤒᤧᤀᤠᤱ ᤁᤠᤰ ᤐᤠ᤺ᤴᤜᤠ ᤐᤢᤛᤠ ᤜᤠᤱᤔᤧᤴ ᤆᤧᤰᤋᤢ॥
ᤌᤱ ᤐᤥ᤺ᤰᤂᤧ॥
ᤛᤒᤠᤀᤡᤴ ᤌᤠᤱᤛᤡᤱᤆᤱᤌᤠᤱ ᤗᤠᤛᤧᤒᤧᤀᤠᤱ ᤐᤢᤛᤠ ᤜᤠᤑᤠ ᤔᤰᤌᤠᤛᤢ॥
ᤋᤰᤔᤡᤒᤧᤸᤗᤧ ᤛᤡᤱᤒᤢᤱᤜᤠ᤹ ᤀᤠᤰᤂᤢᤀᤠᤱ ᤗᤠᤵᤑᤧᤛᤢᤛᤡ॥
ᤂᤧᤸᤗᤧ ᤁᤢᤍᤠᤍᤡᤰᤐᤠ ᤐᤢᤛᤠᤜᤠ᤹ᤖᤧ ᤌᤰᤛᤠᤔᤡᤂᤠ᤹ ᤔᤧᤛᤥ᤺ᤰᤋᤢᤀᤠᤱ ᤔᤧᤍᤩᤠ॥
ᤆᤵᤗᤧᤰᤗᤧ ᤌᤰᤛᤠᤜᤠ᤹ ᤔᤡᤰᤔᤧᤴᤏᤧ ᤔᤧᤒᤥ᤺ᤰᤂᤧᤀᤠᤱ ᤔᤧᤜᤠᤒᤧᤖ ᤔᤧᤑᤡᤰᤋᤧᤖ ᤔᤧᤂᤧᤳᤇᤡᤱ॥
ᤁᤓᤠᤍᤠᤰ ᤇᤡᤰᤏᤠᤘᤠᤀᤡᤴ ᤀᤠᤳᤋᤡᤴ ᤗᤧᤵᤛᤠᤅᤠᤱ ᤔᤧᤴᤗᤠᤳᤋᤣ ᤘᤕᤧ॥
ᤆᤡᤰᤏᤠᤘᤠᤀᤡᤴ ᤐᤢᤜᤠ᤹ᤖᤧ ᤀᤠᤒᤠᤅᤣ ᤗᤧᤵᤛᤠᤒᤠ ᤔᤧᤈᤥᤃᤢ॥
ᤂᤧᤴ ᤋᤠᤴᤍᤡᤰᤐᤠᤃ ᤐᤠᤰᤋᤢ ᤌᤰᤛᤢᤒ᤻ ᤜᤠ ᤋᤃᤡ ᤁᤧᤒᤣ᤺ᤰᤐᤠ ᤔᤧᤒᤥ᤺ᤰᤂᤧ॥
ᤔᤠᤰᤕ᤻ᤜᤠ᤹ᤖᤧ ᤀᤣᤃᤠᤱ ᤛᤒᤠᤜᤠ᤹ ᤕᤱᤔᤥ ᤂᤧᤴ ᤀᤣᤃᤠᤱ ᤋᤰᤔᤡᤓᤠ᤹ ᤁᤧᤒᤣ᤺ᤰᤐᤠ ᤔᤧᤒᤥ᤺ᤰᤂᤧ॥
ᤔᤠᤰᤕᤢᤔᤡᤰ ᤀᤠᤀᤰᤛᤧ ᤐᤢᤗᤢᤑᤠ᤹ ᤔᤧᤛᤡᤱᤛᤡᤅᤠᤱ ᤔᤧᤕᤢᤅᤧᤀᤠᤱ ᤂᤧᤱᤜᤠ᤹ ᤋᤰᤔᤡᤒ᤻ᤏᤢ ᤛᤒᤠᤜᤠ᤹ᤖᤧ ᤔᤧᤏᤡ᤺ᤛᤢᤛᤡᤀᤠᤱ ᤆᤡᤱᤆᤠᤱ ᤕᤧᤱᤆᤠᤱ ᤔᤧᤜᤡᤵᤋᤢᤛᤡ ᤔᤧᤖᤠᤰᤋᤢ ᤔᤧᤛᤧᤖᤢᤛᤡ॥
ᤂᤧᤴᤕᤧ ᤐᤢᤜᤠ᤹ ᤜᤠᤖᤡ ᤔᤧᤎ᤻ᤕᤠᤒᤠ ᤏᤡ᤺ᤛᤢᤀᤠᤱ ᤆᤡᤰᤏᤠᤒᤠᤀᤡᤴ ᤌᤛᤠ ᤋᤃᤡ ᤐᤣᤀᤠᤱ ᤐᤠᤖᤧ." ᤀᤥᤀᤠᤔᤧᤳᤋᤧ᤹. ᤀᤡᤱᤃᤠ᤹ ᤌᤰᤛᤠ᤹ᤀᤠ॥
ᤀᤠᤔᤢᤖᤠ ᤜᤧᤵᤔᤥ ᤂᤧᤏᤡ᤹ ᤜᤧᤰᤁᤣᤒ᤻ ᤀᤠᤜᤧᤒᤥ ᤔᤧᤒ᤹॥