Virelai24.txt

Cils a bien foie pensée
Qui me cuide à ce mener
Que celui, où sui donnée,
Laisse pour un autre amer.

Se ne porroit avenir
Que guerpir
Le peusse nullement
Ne qu'en moy peust venir
Le plaisir
D'autre amer, car vraiement
En s'amour sui si fermée
Et mise sans dessevrer
Que pour creature née
Ne le porroie oublier.
Cils a bien fole pensée.

Mi penser, mi souvenir,
Mi desir
Et m'amour entierement
Sont en li, sans departir,
Qu'avenir
Ne puis à joie autrement,
Car sans li riens ne m'agrée,
Sans li tout dous m'est amer.
D'autre ne quier estre amée
Fors de li qu'aim sans fausser.
Cils a bien fole pensée.

Ne plus qu'on porroit tarir
Et tenir
La mer sans nul mouvement
Ne porroit on repentir
N'alentir
Mon cuer d'amer loyaument
Li qui dessus tous m'agrée.
S'en doy bien Amours loer,
Quant je sui enamourée
Dou milleur qu'on puist nommer.
Cilz a bien fole pensée etc.