Lai8.txt

On parle de richeces et de grant signorie
D’avoir sens los puissance biaute noble lingnie
De grant prouesse acquerre d’onneur decourtoisie
Mais qui n’a souffisance je di que il mendie

Car se quanque Nature aus eureus ottrie
Et quanqu’il a en monde et plus que je ne die
Servoit a un seul homme comme amis et amie
S’il ne li souffisoient riches ne seroit mie

Qu’il n’est mie assevis pour estre en mendiance
Mais quant uns petis homs prent en gre sa chevance
Si qu’elle li souffist on dit en audience
Qu’il est aussi riches comme est li rois de France

Si puis par ce prouver qu’avoirs ne grant sciance
Prouesse honneur biaute lignage ne vaillance
Nature n’autre rien dou monde n’ont puissance
De faire riche un cuer s’il n’i a souffisance

Einsi est des amans qui vivent en desir
Il en y a aucuns qu’on ne puet assevir
N’il ne prennent en gre gracieus recueillir
Dous ris ne biau parler que il puissent oir
Eins mendient des biens qu’Amours a a partir
Et s’en ont a plente pour leurs cuers soustenir
Mais pas ne leur souffist si ne font que languir
Quant a joie gringnour ne pueent avenir

Et des autres y a qui ne vuelent joir
Fors d’un tres dous regart ou de leur dame vir
Ou de ce qu’il feroit doucement conjoir
Ou d’amer loyaument s’on le deingne souffrir
Et si bien leur souffist qu’il ne leur puet venir
Cuer de plus desirer tant y ont grant plaisir
Don’t qui l’un de ces bien prent au goust de merir
Je di qu’il a merci quant plus ne vuet querir

Car avis m’est que mercy autre chose
N’est fors avoir ce qu’amans plus desire
Et s’il ha son desir sans contredire
Il a merci don’t en pais se repose

Mais ja merci n’iert en amant enclose
Pour riens qu’Amours puisse faire ne dire
Se souffissance a li ne fait souffire
Qui des vertus est la fleur et la rose

Si vueil merci souffissance apeler
Et ensement souffissance mercy
Car c’est tout un ne je ne puis trouver
Que qui a l’un qu’il n’ait l’autre aussi
Quant en amours ne veoir ne puis ci
Que l’un peust pas sans l’autre durer
Qu’on ne porroit nullement separer
L’un de l’autre tant sont joint et onni

Si se doit moult loyaus amans pener
De faire tant qu’il ait le dous ottri
Qu’on apelle mercy guerredonner
Et quant il l’a il le doit garder si
Comme sa vie et com l’onneur de li
Pour soffisance en son cuer arrester
Car s’il les a plus ne puet desirer
Ne plus voloir eins a cuer assevi

Et quant dame de sa noblesse
Puet faire de don tel hautesse
Et garir de toute tristesse
Sans ce qu’en riens en soit grevee
Cils est eureus qui s’adresse
A servir si bonne maistresse
Si doit estre comme deesse
De li servie et aouree

Et dame doit faire largesse
De ses riches dons sans promesse
Mais qu’au donner s’onneur ne blesse
Car la doit bien estre avisee
Et lors s’il ont la droite adresse
De souffisance il ont richesse
Pais et repos deduit leesse
Un seul cuer et une pensee

Car il n’i a point de moien
Eins ont tout une volente
Une plaisence une sante
Une vie et un parfait bien
Qui n’a deffaut de nulle rien
C’est la fontainne de plante
C’est la fleur de toute bonte
C’est le souverein bien terrien

Nuls d’eaus ne scet dire “c’est mien”
Pour ce que c’est une unite
Conjointe par vraie amite
Sans barat et sans mal engien
C’est le droit neu c’est le lien
De foy de pais de loyaute
D’onneur de joie d’onneste
Meint bray amant le scevent bien

Si ne tient pas a Amours
N’a moy que mes dous amis
N’ait souffisance et secours
Et qu’il ne soit assevis
Car de tout le bon confort
Que penser puis le confort
Et conforterai toudis
Sauve m’onneur par le sort
D’Amours qui a ce m’a mis

Ne mes loiaus cuers aillours
Ne porroit estre pensis
Pour ce que c’est mes retours
Et mes humeins paradis
Et s’il vuet autre deport
Je di que fois en li dort
Et qu’il est d’Amours partis
Quar qui plus quiert il a tort
Et s’est d’onneur annemis

Qu’Amours ha nature
Si noble et si pure
Qu’il n’est creature
Qu’elle ne forjure
Ne dont elle ait cure
S’il pense a laidure

Mais ce m’asseure
Que raisons mesure
Loyaute droiture
Sont en la figure
Qui me fait pointure
Souvent douce et sure

Ne ja ne croiray
Qu mon ami gay
N’ait fin cuer et vray
Pour ce acompliray
Tant com je porray
Son vueil bonnement
Qu’a si bon le say
Que n’en partiray
Ne repentiray
Einsois l’ameray
Tant com je vivray
De cuer loyaument

Pour griete n’esmay
Ne l’oublieray
Ne deguerpiray
Foy li porteray
Pais li garderay
Et souvereinnement
Son honneur vorray
Joie li querray
Toute a li seray
Et quant je morray
Mon cuer li layray
C’iert mon testament

Si qu’en pais vit
Qui abelit
Et en delit
Qui l’esbaudit
Ce renverdit
Ce resjoit
Ce rajonit
Son esperit

Ce l’embelit
Ce l’adoucit
Ce l’agencit
Ce l’apertit
Ce le norrit
Ce l’enrichit
Ce l’assevit
Qu’il li souffit

Si que plour
Ne tristour
N’anoy
N’a n’irour
Ne dolour
Ce croy

Car savour
Et doucour
D’ottroy
Nuit et jour
Font sejour
En soy

Dont quant de li amee loyaument et cherie
Sui creinte desiree honnouree obeie
Sans villeinne pensee et humblement servie

Pour ce de vray corage de volente jolie
De pensee amoureuse en plaisence norrie
Li doing m’amour entiere or soit miens sans partie
Et je vueil estre sienne tous les jours de ma vie