Lai10.txt

<d 1a>
Amis, t'amour me contreint
Si qu'il me convient descrire
Le martyre
Qui empire
Mon corps et mon cuer esteint
Et de griees si m'enseint
Que je ne saroie eslire
Le meins pire;
Dont matire
N'ay qui a joie me meint.
<d 1b>
Et mes cuers toudis se pleint
Que nulle fois ne desire
Gieu ne rire,
Eins soupire,
Quant mors ma vie n'esteint;
Ne les cent pars de son pleint
Cuer penser ne bouche dire
N'a l'escrire
Mains souffire
Ne porroit. Tant se compleint,
<d 2a>
Qu'a toute heure
Li las pleure:
S'en devient plus noirs que meure,
Ne solas n'est et son plour,
Qui aqueure
Ne labeure
Pour li, si qu'on le sequeure
De confort en sa dolour.
<d 2b>
Ce l'espleure
Et deveure
Si fort qu'en li ne demeure
Vigour, sanc n'autre liquor.
S'en saveure
Mort qui seure
Me courra pour ta demeure,
Dous amis, et pour t'amour,
<d 3a>
Se je ne voy temprement
Ton faitis corps gent;
Car, vraiement,
Longuement
En ce point durer ne puis
Pour desir qui si griefment
M'assaut et esprent
Qu'en mon dolent
Cuer souvent
Morte m'esperence truis,
<d 3b>
Quant souvenirs ne me rent
Nul aligement
Fors grief torment
Qui m'aprent
Hair mes jour et mes nuis,
Et je de toy fermement
Croy que nullement
D'esbatement
N'as talent
Et quant riens ne te deduis.
<d 4a>
C'est ce dont plus me demente,
Car je croy,
Dous amis, que tes cuers sente
Tel anoy
Pour moy com je l'ay pour toy.
Lasse! chetive, dolente,
Bien hair ma vie doy,
Quant je voy
Que tous ces maus nous presente
Bonne foy.
<d 4b>
Car je t'aim en vraie entente
Et tu moy,
Et pour ce einsi nous tourmente
Le desroy
De Fortune qui n'a loy
Que m'eslongne ta jouvente,
Dont tous les jours en requoy,
Sans arroy,
En guises plus de cinquante
Me desvoy.
<d 5a>
Amis, je soloie
Avoir tant de joie,
Quant je te veoie;
Plus ne demandoie
Ne plus ne voloie:
Souffisance avoie;
C'estoit quanque je queroie.
Jolie en estoie,
Gaie en devenoie,
Plus simple et plus quoie;
Tant en amendoie
Que ne le saroie
Dire ne porroie,
Quant ton gent corps remiroie.
<d 5b>
Lasse! or n'est il voie
Qui mon oueil avoie
Comment je te voie
Ne comment j'envoie
Vers toy, si que j'oie
Ce que je voudroie,
C'est bien de toy qui m'esjoie.
Pour ce ades larmoie
Mes cuers qui se noie
En plours et renoie
Tous gieus. Qu'en diroie?
Quanque voy m'anoie,
Homme n'en croirie,
Qu'avoir bien loing de toy doie.
<d 6a>
Tres dous amis,
Ce m'ont tramis
Et en moy mis
Amour vraie et entiere,
Tes corps faitis,
Lons et traitis,
Tes cuers gentils
Et ta douce maniere.
<d 6b>
Qu'a mon avis
Yes assevis,
A droit devis,
De riche honneur et chiere,
Et de ton vis,
Qu'a veoir devis,
Fu, ce m'est vis,
Nature bonne ouvriere.
<d 7a>
Si qu'amis, n'aies penses
Que pour longue demouree,
Pour Fortune, la dervee,
Ne pour creature nee
Te mette en oubli,
Qu'a tous jours, sans decevree,
Est m'amour en toy fermee,
Com suer, amie et amee,
Ne tant com j'aray duree
N'aray autre amy.
<d 7b>
Oublie ta destinee
Et pense a ta retournee,
Que joie guerredonnee,
Par honneur prise et donnee,
T'iert sans lonc detri,
Et comment riens ne m'agree
Sans toy. Dont j'ay esplouree
La face et descoulouree;
Ce n'est pas chose celee:
Bien il pert a my.
<d 8a>
Amis, ne doubter
Que les bois aler,
Les mons avaler,
Les bestes parler,
Les poissons voler
Verras, quant je te lairay;
Le temps arrester,
Une loy garder,
Envie finer,
Seinne retourner
Et tarir la mer,
Quant seur tout ne t'ameray.
<d 8b>
Si dois conforter
Ton cuer et donter,
Et considerer,
Comment, sans fausser,
T'aim et vueil amer
De loyal cuer fin et vray,
Et laissier ester
Tout ce qu'amender
Ne pues, et penser
Que face muer
En dous amis amer,
Amis, quant je te verray.
<d 9a>
Amis, encor bien dire l'os
Qu'oncques Tristans ne Lancelos,
Paris, Guenevre, Yseult ne Heleinne
N'ensuirent si le pourpos
De loyaute et les esclos
Comme je fais, n'a tant de peinne.
<d 9b>
Car joie n'ay, pais ne repos
Pour toy, n'onques ne me repos,
Amis, quant je te sui lonteinne
Et quant einsi te voy enclos.
Mais je te promet a bries mos
Que loyal te sui et certeinne.
<d 10a>
Pren confort
En amer fort,
En tous cas,
Et au port
De desconfort
Ne va pas:
Se tu y vas,
S'i verras
Son effort,
Que le solas
En aras
De la mort.
<d 10b>
Se ton sort
Et ton ressort
En li as,
Meint deport
Et meint emport
Y penras;
Plus ne diras,
Chetis, las:
"Amours dort,"
Car en ses las
Nulz n'est mas,
S'il n'a tort.
<d 11a>
Bien croy que le grant desir
Que tu as de revenir
A fait bersaut
De ton cuer et qu'il l'assaut
Par grant air,
Et qu'il trait pour li honnir,
Dont il tressaut,
Garros de froit et de chaut
Par souvenir.
<d 11b>
Ce te fait teindre et palir,
Dementer, plourer, gemir
Et en tressaut
Faire meint tour et meint saut
Et meint soupir.
Bien m'en scay a quoy tenir,
Car tel assaut
Tous les jours souffrir me faut
Et soustenir.
<d 12a>
Ce bruist mon cuer et teint;
Car tout aussi com la cire
Fondre et frire,
Tire a tire,
Fait li feus, quant il ateint,
T'amour, qui en moy remaint,
Fait mon cuer fondre et desfrire,
Diex l'i mire,
Ni faut mire
For li qui me fait mal meint.
<d 12b>
Car desirs ne se refreint,
Eins me cuide desconfire:
Si m'atire
Et martire.
Mais esperence le veint.
Or pri Dieu que tes cuers m'eint,
Si qu'a faussete ne tire
Pour ocire
Le mien d'ire,
Et qu'a joie te rameint.